Helgin smelgin... ég er núna að upplifa minn þriðja sunnudag þessa helgi... það er ekki oft sem maður er svo heppinn! Fyrsti sunnudagurinn var á laugardaginn því þá voru tvö hefðbundin djömm að baki, þynnka, svefnleysi og vídjógláp settu mark sitt á hann eins og sönnum sunnudegi sæmir. Við djömmuðum sumsé bæði á fimmtudagskvöldið og á föstudagskvöldið... Fórum í partí á vegum skólans bæði kvöldin og það var bara rosa gaman... reyndar var þetta meira í líkingu við að fara á skemmtistað þar sem var diskó annað kvöldið og voða skemmtileg finnsk hljómsveit hitt kvöldið. Eftir þessi partí/diskó/böll var svo haldið á ólöglega pöbba (top secret sko) sem eru á hverju strái á háskólasvæðinu. Þar kostar bjórinn sama og ekki neitt, a.m.k. á íslenskan mælikvarða, skitnar 1,5 evrur (sem er um kr. 130,- ...ódýrara en kók útí búð á �slandi!). Þessir pöbbar eru æði og loka ekki fyrr en daginn eftir þegar allir eru sofnaðir yfir bjórglasinu sínu... við vorum ekki síðust út, þrátt fyrir að hafa verið þar til rúmlega 7 um morguninn. Allavega... sunnudagur númer tvö var svo hin eiginlegi sunnudagur sem var í gær, þá gerði ég lítið annað en að hanga hjá Þórhildi (og gerði heiðarlega tilraun til að kíkja í námsbækur... en hún mistókst) og nú er ég að búa mér til minn þriðja sunnudag. Það gerðist reyndar óvart... ákvað óvart að skrópa í skólann í morgun til að geta lært fyrir fyrsta prófið mitt sem er á miðvikudaginn... svo þessi sunnudagur ætti að einkennast af vefjafræðilestri sem hefur reyndar lítið farið fyrir fram að þessu. Sjáum hvað setur.

Annars fór ég óvart á húsfélagsfund um daginn, Sabine, meðleigjandi minn sagði mér að það væri kaffiboð í sjónvarpsherberginu til að hrista saman fólkið sem býr á stúdentagörðunum... við mættum og gengum beint inn á afar formlegan fund á finnsku. Skildum náttla ekki baun en sátum samt í 47 mínútur og hlustuðum á þetta merkilega mál. Þá gáfumst við upp og létum okkur hverfa. Málið var að tilkynningin um fundinn hafði verið á finnsku og Sabine hafði misskilið hana svona herfilega... gaman að vera úglendingur í úglöndum...